د نورستان او ننګرهار پوهنتونونو تر منځ د علمي همکاريو په موخه ګډ هوکړه ليک لاسليک شو
د نورستان او ننګرهار پوهنتونونو تر منځ د علمي همکاريو په موخه ګډ هوکړه ليک لاسليک شو!
نورستان پوهنتون د خپل علمي پرمختګ په ترڅ کې له ننګرهار پوهنتون سره د ګډ کار کولو په موخه یو (۳) کلن هوکړه ليک لاسليک کړ، چې ورسره به د دواړو پوهنتونونو په علمي، تحقيقاتي، کيفيت لوړونې، د استادانو او اداري کارکوونکو د ظرفيت لوړونې، د محصلينو په عملي زده کړو او ورته نورو برخو کې اسانتياوې او پرمختګونه رامنځته شي. ياد هوکړه ليک د ننګرهار پوهنتون په رياست مقام کې د دې پوهنتون رئيس ش.يخ انعام الله مدني او د نورستان پوهنتون رئيس استاد حميدالله عابد له لوري لاسليک شو. د هوکړه ليک لاسليک پر مهال د ننګرهار پوهنتون رئيس صاحب وويل، چې د ياد تفاهمليک په اساس به د دواړو پوهنتونونو تر منځ علمي او تحقيقاتي اړيکې پياوړي او ګډه همکاري به پراختيا ومومي، چې ورسره به د تجربو شريکولو له لارې دواړو پوهنتونونو ته د پرمختګ زمينه هم برابره شي. همدارنګه په ورته وخت کې د نورستان پوهنتون رئيس صاحب په خپلو خبرو کې د ننګرهار پوهنتون له لوري نورستان پوهنتون سره د ترسره شوو مرستو او همکاريو څخه د مننې ترڅنګ د ياد هوکړه ليک په لاسليک کولو خوښې څرګنده کړه او ويې ويل، چې د ياد هوکړه ليک له مخې به د نورستان پوهنتون د استادانو، اداري کارکوونکو او محصلينو په ظرفيت لوړونې او نورو علمي برخو کې مثبت بدلون او پرمختګ رامنځ ته شي. نېټه: يکشنبه ۱۴۴۷هـ.ق، جمادی الأول ۱۱مه ۱۴۰۴هـ.ش، لړم ۱۱مه
سرچينه: د نشراتو لوی مديريت
